Friends of Prelacy Dinner

26. January, 2016NewsNo comments

Ազգային Առաջնորդարանի բարերարներու՝
շնորհակալական ընթրիք

Տարիներու գեղեցիկ աւանդութեան համաձայն, այս տարի եւս Գանատայի Ազգային Առաջնորդարանը, ջերմ եւ զուարճալի մթնոլորտով տոգորուած մտերմիկ ընթրիք մը կազմակերպեց Մոնթրէալի Հայ Կեդրոնի Ահարոնեան սրահին մէջ, որուն սեղաներուն շուրջ բոլորուած էին սոյն համայնքին ազգանուէր ծառաները եւ Ազգային Առաջնորդարանին օժանդակող բազմավաստակ բարեկամներն ու բարերաները։
Բարի Գալուստի խօսքը փոխանցեց Ազգայի Վարչութեան ատենապետ, պրն. Գրիգոր Տէր Ղազարեանը, որմէ ետք տեղի ունեցաւ պաշտօնական ընթրիքը։ Ընթացքին տեղի ունեցան երաժշտութեան եւ երգարուեստի ներկայացումներ ու մեներգներ, կատարողութեամբ համայնքիս նորաբողբոջ երաժշտասէր սերունդին եւ արոեստագէտ Էլի Պէրպէրեանին։
Աւարտին Թեմիս Առաջնորդ՝ Գերաշնորհ Տ. Մեղրիկ Եպիսկոպոս Բարիքեանը, իր շնորհակալական եւ «տալու» գոհունակութիւնը բացատրող խօսքերով եւ «Պահպանիչ» աղօթքով փակեց երեկոն։

Shiragatsi Awards

26. January, 2016NewsNo comments

Գանատայի Հայոց Թեմի
«ԱՆԱՆԻԱ ՇԻՐԱԿԱՑԻ»ի շքանշանով պարգեւատրուեցան
երաժիշտ եւ ղեկավար՝ Նուրհան Արման
եւ
երաժիշտ երգահան եւ կիթարիստ՝ Լեւոն Իշխանեան

Չորեքշաբթի, 6 Յունուար, 2016-ի առաւօտեան, Սրբազան Հայրը նախագահեց Սուրբ Ծննդեան եւ Աստուածայայտնութեան առիթով պաշտուած Ժամերգութեանց։ Այս առիթով մատուցուեցաւ հանդիսաւոր Սուրբ եւ Անմահ Պատարագ։ Պատարագեց Առաջնորդ Սրբազան Հայրը եւ քարոզեց հետեւեալ բնաբանով. «Ազգերը քու լոյսիդ պիտի գան, ու թագաւորները՝ քու վրադ ծա-գած պայծառութեան» (Եսայի 60.3)։
Սուրբ եւ Անմահ Պատարագի աւարտին Հայ Կոդրոնի սրահին մէջ, շուրջ 450 հա-յորդիներու, մատուցուեցաւ Սուրբ Ծննդեան Սիրոյ Սեղանը, Նախագահութեամբ՝ Առաջնորդ Սրբազան Հօր։ Այս առիթով, Սրբազան Հայրը անգամ մը եւս մի առ մի շնորհաւորեց բոլոր ներկաներուն Սուրբ Ծննդեան Տօնը։ Իր Հայրական Պատգամով գնահատեց Սուրբ Աստուածածին Եկեղեցւոյ բոլոր բարի ճիգերը եւ ընդառաջելով Եկեղեցւոյ Հովիւներուն եւ Հոգաբարձութեան խնդրանքին, Ազգային Առաջնորդա-րանի «ԱՆԱՆԻԱ ՇԻՐԱԿԱՑԻ»ի շքանշանով զարդարեց երաժիշտ եւ ղեկավար՝ Նուրհան Արմանի ու երաժիշտ երգահան եւ կիթարիստ՝ Լեւոն Իշխանեանի լամբակները։
Այս առիթով Սրբազան Հայրը շնորհակալութիւն յայտնեց նաեւ Սիրոյ Սեղանի նախագահ ամոլին՝ Տէր եւ Տիկին Յարութիւն եւ Ալիս Շիթիլեաններուն, անոնց յանձնելով Սուրբ Աստուածածին Եկեղեցւոյ կողմէ տրամադրուած յիշատակի նուէր մը։ Սիրոյ Սեղանը վերջ գտաւ Սրբազան Հօր Աղօթքով եւ «Խորհուրդ Մեծ» շարա-կանի եւ «Կիլիկիա»ի մաղթերգով։

Press Release

13. January, 2016NewsNo comments

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍԻ
Ս. ԾՆՆԴԵԱՆ ՀԱՅՐԱՊԵՏԱԿԱՆ ՊԱՏԳԱՄԸ

ՔՐԻՍՏՈՍԻ ԾՆՈՒՆԴԸ՝

ՎԵՐԱԾՆՈՒՆԴԸ ՄԱՐԴՈՒՆ
Աստուծոյ Որդւոյն ծնունդը Բեթղեհէմի մէջ Յակոբոս Առաքեալ կը բնորոշէ որպէս՝ վերածնունդը մարդուն. «Աստուած կամեցաւ մեզ վերստին ծնիլ» (Յկ 1.18)։ Քրիստոնէական հաւատքին առանցքը կազմող Առաքեալին այս վկայութեան լոյսին տակ, սիրելի հայորդիներ, եկէք նայինք Աստուածաշունչին։
Արդարեւ, Աստուծոյ կամքը սկիզբն է ու մղիչ ուժը Աստուծոյ յայտնութեան։ Աստուած կամեցաւ տիեզերքը ստեղծել. եւ ստեղծեց։ Աստուած կամեցաւ ստեղծել մարդը, որպէս տիեզերքի պահապան եւ իրեն գործակից. եւ ստեղծեց՝ մարդը օժտելով բանականութեան ու ինքնիշխանութեան շնորհներով ու միաժամանակ յիշեցնելով անոր իր ապրած կեանքին ու կատարած գործերուն համար իր Արարիչին համարատու ըլլալու պարտաւորութիւնը։
Հակառակ այն իրողութեան, որ մարդը շահագործեց Աստուծոյ կողմէ իրեն տրուած լայն կարելիութիւնները՝ զանոնք օգտագործելով իր փառքին ու հաճոյքին համար. ինչպէս նաեւ հակառակ այն իրողութեան, որ մարդը իր կեանքին ու կատարած գործին համար մերժեց հաշուետու դառնալ Աստուծոյ, սակայն Աստուած, որպէս գթասիրտ հայր, միշտ բարին կամեցաւ մարդուն համար։ Աստուած իրմէ հեռացած մարդուն մօտեցաւ, իր սէրը մերժած մարդը սիրեց, եւ մոլոր ճամբաներէն քալող մարդը հրաւիրեց քալելու ճշմարիտ ճամբէն։

Archives