Prelate visits Vancouver Community AUG 19-22, 2016

30. August, 2016NewsNo comments

Գանատայի Հայոց Թեմի Առաջնորդ Գերշ. Տ. Բաբգէն Արք. Չարեանի
Անդրանիկ Այցելութիւնը Վանգուվըր


Ուրբաթ 19 Օգոստոս 2016-ին Գանատայի Հայոց Թեմի Առաջնորդ Գերշ. Տ. Բաբգէն Արք. Չարեան անդրանիկ այցելութեամբ ժամանեց Վանգուվըր։ Օդակայանին մէջ դիմաւորուեցաւ Վանգուվըրի Ս. Գրիգոր Լուսաւորիչ եկեղեցւոյ Հոգեւոր Հովիւ Հոգշ. Տ. Հրանդ Վրդ. Թահանեանի, Հոգաբարձութեան, պատկան մարմիններու եւ գործակից միութիւններու ներկայացուցիչներուն կողմէ։

Նոյն օրը երեկոյեան ժամը 7-ին Առաջնորդ Սրբազան Հայրը ժամանեց Ս. Գրիգոր Լուսաւորիչ եկեղեցի եւ արժանացաւ ժողովրդային մեծ ընդունելութեան։ Հացի եւ աղի օրհնութենէն յետոյ «Հրաշափառ»ով, դպրաց եւ սարկաւագաց դասերու առաջնորդութեամբ, թափօրով մուտք գործեց եկեղեցի, ուր տեղի ունեցաւ կանոնական աղօթք։ Ապա Հոգեւոր Հովիւ Հայր Սուրբը, յանուն Ս. Գրիգոր Լուսաւորիչ եկեղեցւոյ մեծ ընտանիքին, բարի գալուստ մաղթեց Առաջնորդ Սրբազան Հօր, որմէ ետք Գերշ. Տ. Բաբգէն Արք. Չարեան տուաւ իր անդրանիկ պատգամը։

Սրբազանը Հայրը իր խօսքին մէջ, նախ ողջունեց Վանգուվըրի հայութիւնը, Հոգեւոր Հովիւը, գաղութէն ներս գործող միութիւններն ու

պատկան մարմինները եւ ներկայութիւնը եկեղեցւոյ նախկին Հոգեւոր Հովիւ եւ այժմու Կիլիկիոյ Կաթողիկոսութեան Միջ-եկեղեցական Բաժանմունքի Վարիչ Գերպ. Տ. Յուսիկ Ծ. Վրդ. Մարտիրոսեանի, որ յատուկ հրաւէրով կը գտնուի Վանգուվըր ներկայ ըլլալու Ս. Գրիգոր Լուսաւորիչ եկեղեցւոյ եւ Հայ Կեդրոնի կազմակերպած «Սասուն» հայ պարի ամառնային ճամբարի 10-րդ ամեակի հանդիսութեան։

Սրբազան Հայրը իր խօսքին մէջ շեշտեց կարեւորութիւնը քրիստոնէական հաւատքին եւ հայեցի դաստիարակութեան, որոնք հիմքը կը կազմեն մեր նոր սերունդի առողջ կազմաւորման եւ ճշմարիտ քրիստոնեայի ու իսկական հայու կերտման։ Ան կոչ ուղղեց, որպէս ամբողջական մեծ ընտանիք համախմբուելու եկեղեցւոյ շուրջ՝ միասնական ճիգերով եւ համագործակցութեամբ գաղութի ազգային եկեղեցական կեանքը աշխուժացնելու եւ մեր նոր սերունդը դաստիարակելու ազգային արժէքներով։

Իր խօսքի աւարտին, Գերաշնորհ Առաջնորդ Սրբազանը ընթերցեց Ն.Ս.Օ.Տ.Տ. Արամ Ա. Կաթողիկոսի Կոնդակը, ուր Վեհափառ Հայրապետը լանջախաչ կրելու իրաւունք կը շնորհէր Հայր Հրանդին եւ ապա լանջախաչ մը անցուց Հայր Սուրբին վիզէն։

Եկեղեցական արարողութենէն ետք Սրբազան Հայրը կատարեց ջրաղբիւրի բացումը, որուն բարերարներն էին Սարաֆեան ընտանիքը։ Ապա, Սրբազան Հայրը ներկայ գտնուեցաւ «Սասուն» ճամբարի աւարտին, Սուրբ Գրիգոր Լուսաւորիչ եկեղեցւոյ հոգաբարձութեան կողմէ կազմակերպուած ընտանեկան Ֆեսդիվալին։

Նշենք, որ Գերշ. Տ. Բաբգէն Արքեպիսկոպոս յառաջիկայ օրերուն զանազան հանդիպումներ պիտի ունենայ հոգաբարձութեան, գործակից միութիւններու եւ պատկան մարմիններու հետ, ինչպէս նաեւ Կիրակի օր Ս. Եւ Անմահ Պատարագ պիտի մատուցէ եւ ապա նախագահէ «Սասուն» հայ պարի ամառնային ճամբարի 10-ամեակի հանդիսութեան։

Veramoud 2016

28. August, 2016NewsNo comments

ՇՆՈՐՀԱՒՈՐ ՆՈՐ ՎԵՐԱՄՈՒՏ

 

Սիրելի աշակերտ եւ աշակերտուհիներ,

Քրիստոնէական ամենաջերմ սիրով կ՚ողջունեմ եւ իմ սրտի խօսքը կը փոխանցեմ ձեզ 2016-2017 դպրոցական վերամուտին առիթով։

Դպրոցներու վերամուտը տօնական առիթ մըն է իւրաքանչիւրիս համար, անկախ տարիքէն ու սէրէն, ըլլանք աշակերտ թ՛է ուսուցիչ, տնօրէն կամ պատասխանատու, ծնողք կամ բարերար։

Ամառնային արձակուրդը իր աւարտին հասաւ։ Դարձեալ պէտք է լծուիլ աշխատանքի, ժամանակը օգտագործելու, լեցնելու եւ արժեւորելու համար։

Ահաւասիկ, նոր սկիզբ… նոր տարեշրջան։ Եղէք իսկական աշակերտներ, աշխատասէր, հնազանդ ու կարգապահ։

Հայ Դպրոցը Ձեր հարազատ տունն է, այն առողջ միջավայրն է, ուր դուք հասակ կ՚առնէք, կը մեծնաք, կը թրծուիք հայեցի շունչով եւ կը հարստանաք մեր ազգի անժամանցելի գանձերով՝ հայոց լեզուվ ու պատմութեամբ։

Հայ Դպրոցը այն միակ դարբնոցն է, որ նիւթը հոգիի կը վերածէ ու կը ներշնչէ ձեզ դառնալու հայրենասէր ու ազգասէր աշակերտներ, թ՛է դպրոցը կեանքի մէջ եւ թ՛է ձեր ընտանեկան յարկերէն ներս ու միաժամանակ միութիւններու եւ հայ կեդրոններուն մէջ։

Ժամանակը մի վատնէք, ժամանակը ձեր նուաճումներով ու յաջողութիւններով յաղթեցէք։ Մի բաւարարուիք միայն գիտութեամբ հարստանալու, այլ մանաւանդ հետամուտ եղէք, տէրը ու պաշտպանը դառնալու՝ մեր ազգային-եկեղեցական սրբութիւններուն եւ արժէքներուն, որոնցմով միայն կ՚ունենանք երաշխիքը մեր ժողովուրդի յարատեւ գոյատեւման։

Վստահ եմ որ այս գիտակցութեամբ պիտի մտնէք դասարան, ուրախութեամբ եւ ժպիտով պիտի սորվիք ձեր դասերը։ Մենք ձեզմով պիտի ուրախանանք եւ փառք պիտի տանք Աստուծոյ, որ նման աշակերտներ, նման նոր սերունդ ունինք, որոնցմով աւելի ապահով պիտի զգանք եւ պիտի ունենանք յոյսը ունենալով վաղուան մեր ազգի արդար իրաւունքներուն վերատիրացման եւ յարատեւ գոյատեւման։

Կը շնորհաւորեմ նոր տարեմուտը բոլորիդ՝ մանկամսուրէն մինչեւ երկրորդականի աշակերտ-աշակերտուհիներ։

Այս առիթով, կը շնորհաւորեմ նաեւ համալսարան մուտք գործող նորամուտ ուսանողները եւ իրենց կը մաղթեմ յաջողութիւն oորպէսզի աւելի բարձր վկայականներու արժանանալուն մաղթանքով։

Կը շնորհաւորեմ նաեւ դպրոցներու կրթական մարմնի անդամները, տնօրէնները, ուսուցչական կազմերը, ծնողական յանձնախումբերը, բարերարները եւ բոլոր այն անձանց, որոնք անվերապահօրէն զօրավիգ են ու կը սատարեն հայ դպրոցի աշխատանքներուն։

 

Անփորձանք եւ օրհնաբեր տարի մը կը մաղթեմ ձեր բոլորին։

Ձեզ սիրող եւ Ձեզ համար միշտ աղօթող՝

ԲԱԲԳԷՆ ԱՐՔԵՊԻՍԿՈՊՈՍ
Առաջնորդ Գանատայի Հայոց Թեմի

Թեմակալ Առաջնորդը կը շարունակէ իր այցը Վանգուվըրի մէջ

22. August, 2016NewsNo comments

22 Օգոստոս 2016-ին, Գերաշնորհ Տ. Բաբգէն Արք. Չարեան մատուցեց իր անդրանիկ Սուրբ եւ Անմահ Պատարագը՝ Վանգուվըրի Ս. Գրիգոր Լուսաւորիչ Հայց. Առաքելական եկեղեցւոյ մէջ։ Թեմակալ Առաջնորդը իր քարոզի ընթացքին ըսաւ. « … դուք վերստին պէտքէ ծնիք. Աստուած ամէն ինչ ժամացոյցի նման կարգաւորած է տիեզերքը եւ պարգեւած է զայն մարդկութեան։ Մարդն է որ պէտք է վերանորոգէ ինքզինքը վայելելու համար իրեն տրուած այդ պարգեւը։ Մարդը պէտք է վերակագնէ Աստուածային պատկերը, որուն համաձայն ստեղծուած է։ Մարդը իր օրինազանցութեան եւ մեղքի պատճառով խաթարած է Աստուածային այդ պատկերը։ Այդ պատճառով պէտք է վերածնի, այսինքն վերափոխուի թեթեւնալու համար մեղքի ծանրութենէն, հեռանալու չարէն եւ իր հայեացքը դարձնելու դէպի Աստուած, վայելելու համար Աստուծոյ տրուած պարգեւները եւ արժանի դառնալու համար երկնքի արքայութեան»։

Իր խօսքի աւարտին, Բաբգէն Արքեպիսկոպոս անդրադարձաւ որ վերամուտներու սեմին ենք, վերանորոգուած յանձնարութեամբ պէտք է սկսինք մեր աշխատանքները, միշտ ձեռք ձեռքի տալով, մէկ նպատակ հետապնդելու՝ մեր նոր սերունդին հայեցի կրթութիւն եւ քրիստոնէական դաստիարակութիւն ջամբելու համար։

Նոյն երեկոյեան, Բաբգէն Արքեպիսկոպոս ներկայ գտնուեցաւ Վանգուվըրի Հայ Կեդրոնի անունով կազմակերպուած «Սասուն Ճամբար»ի 10-ամեակի ձեռնարկին։

Առաջնորդ Սրբազան Հայրը իր խօսքին մէջ ըսաւ. «Պատիւ՝ այն պատասխանատուներուն, որոնք նուիրումով եւ զոհողութեամբ հիմնած են Սասուն ճամբարը։ Սովորական աշխատանք չէ տասնամեայ այս ճամբարը, այլ արդիւնք է կազմակերպիչներուն հաւատքին ու գիտութեան, որոնք հայեցի շունջ կը ջամբեն նոր սերունդի փոքրիկներուն ու պատանիներուն»։ Ան նշեց, թէ միասնական կեցուածքով, վաղուան համար կ՚ունենանք պատրաստ երիտասարդներ, որոնք պահանջատէր են իրենց դատին եւ այս երեկոյի ելոյթով մեր հայեացքը դարձուցին դէպի հայրենիք»։

«Պահպանիչ» աղօթքով Առաջնորդ Սրբազան Հայրը փակեց երեկոն։ Բաբգէն Արքեպիսկոպոս Երկուշաբթի օրուան ընթացքին պիտի հանդիպի ազգայիններու հետ եւ Երեքշաբթի երեկոյեան կը վերադառնայ Մոնթրէալ։

Prelate Tcharian meets with the Mayor of City of Montreal

20. August, 2016NewsNo comments

On Thursday, August 11, 2016, Mayor Denis Coderre paid a special visit to His Eminence Archbishop Papken Tcharian at Prelacy Headquarters in Montreal.

Mr. Coderre congratulated Archbishop Tcharian on his new election as Prelate of the Armenian Prelacy of Canada and welcomed him to Montreal.

Prelate Tcharian thanked the Mayor for his support and collaboration during the centennial of the Armenian Genocide. He appreciated the respect Mr. Coderre has shown towards the Armenian Community in the Greater Montreal and profoundly valued his friendship towards the Armenian people.

On the occasion of Montréal’s 375th anniversary celebrations in 2017, Prelate Tcharian extended his personal and Armenian Community’s support for the projects and events being organized for the year to come.

Mayor Denis Coderree gifted His Eminence a bronze sculptor by artist Jean-Daniel Rohrer, titling “L’Homme de la Paix”, which symbolizes the relationship between the City of Montreal and the City of Hiroshima.

Հայաստանեայց Առաքելական Եկեղեցւոյ Առաջնորդներու Հանդիպում

12. August, 2016NewsNo comments

11 Օգոստոս 2016-ին, Գերաշնորհ Տ. Աբգար Եպկ. Յովակիմեան, այցելեց Գանատայի Հայոց Թեմի Ազգային Առաջնորդարան եւ հանդիպեցաւ նորընտիր Առաջնորդ՝ Գերաշնորհ Տ. Բաբգէն Արք. Չարեանին հետ։

Առաջնորդ Սրբազան Հայրերու հանդիպումը եղաւ ծանօթացման առիթ մը, ուր անոնք խօսեցան ապագայի համագործակցութեան մասին, հիմնուած փոխադարձ սիրոյ եւ յարգանքի վրայ։

Առաջնորդները ծրագրեցին յաճախակի հանդիպումներ գումարել եւ մէկ կեցուածք ցուցաբերել, յատկապէս եկեղեցական տարբեր հարցերու հետ առնչուած որոշումներու մասին։

HORIZON INTERVIEW 2016

10. August, 2016NewsNo comments

Լաւալի Ս. Գէորգ Հայ Առաքելական Եկեղեցւոյ մէջ, 13-14 Մայիս 2016-ի կայացած Գանատայի Հայոց Թեմի Ազգային Երեսփոխանական Ժողովը, Գանատայի Հայոց Թեմի Առաջնորդ ընտրեց Գերաշնորհ Տ. Բաբգէն Սրբ. Արքեպիսկոպոս Չարեանը: «Հորիզոն» առիթ ունեցաւ Առաջնորդ Սրբազանին հետ ստորեւ ներկայացուած հարցազրոյցը կատարելու։

 «Հորիզոն».- Առաջին հերթին, իբրեւ հովուական վաստակաշատ անցեալ ունեցող հոգեւորական, պիտի խնդրէինք, որ մեր ընթերցողներուն հակիրճ գիծերու մէջ ներկայացնէք Նոր Ջուղայի ձեր Առաջնորդական 12-֊ամեայ առաքելութիւնն ու պատմական անցեալով հարուստ Նոր Ջուղայի գաղութը։

Բաբգէն Արք. Չարեան.- Նախ շնորհակալ եմ Հորիզոն Շաբաթաթերթի խմբագրութեան այս առիթին համար, զրուցելու ձեզ հետ եւ իմ մտածումներս բաժնելու մեր ժողովուրդին հետ։ Ճիշդ է, որ 12 տարիներ որպէս Առաջնորդ ծառայեցի Սպահանի Հայոց Թեմի իմ ժողովուրդիս։ Սպահանի Հայոց Թեմը կ՚ընդգրկէ Իրանի կեդրոնական եւ հարաւային շրջաններու մէջ բնակող հայ համայնքները եւ իր աւելի քան 400-ամեայ պատմութեամբ կը համարուի Իրանահայ հնագոյն թեմական կառոյցներէն մէկը։

12 տարիներու ընթացքին, բնականօրէն, գործակից ունենալով թեմական կառոյցներու մէջ աշխատող անձինք, համայնքային կեանքը ղեկավարեցինք տարբեր բնագաւառներու համահայակական բնոյթ կրող աշխատանքները։ Թեմի գերագոյն եւ օրէնսդիր ժողովի կողմէ ընտրուած գործադիր մարմիններն են թեմական եւ կրօնական խորհուրդները։ Թեմական Խորհուրդը իր ենթամարմիններով՝ Կրթական, Բարեսիրական, Կալուածա-տնսեական եւ Երիտասարդական, կը փորձէ համայնքային կեանքը աշխուժացնել եւ հնրաւորինս մեղմացնել հայ ընտանիքներու դժուարութիւնները, հասարակական, երիտասարդական, կրթական, բնակարանային եւ տնտեսական բնագաւառներուն մէջ։ Կրօնական Խորհուրդը իր

ենթամարմիներով՝ Եկեղեցեաց Վարչութիւն, Դատաստանական Խորհուրդ, Քրիստոնէական Դաստիարակութեան Խորհուրդ, հոգեւոր երգչախումբերով եւ լսարաններով, կ՚աշխատի Թեմի կրօնական կեանքը, եկեղեցական արարողութիւնները, քրիստոնէական դաստիարակութեան աշխատանքները կազմակերպել եւ կտակային յատկացումներ կատարել, ինչպէս նաեւ վերահասու դառնալ համայնքի անդամներու խորհրդակատարութիւններուն, ընտանեկան անհամաձայնութիւնները հարթելու եւ ամուսնալուծման հարցերը քննելու եւ վճռահատելու աշխատանքներուն։  Հետամուտ ըլլալ նաեւ եկեղեցիներու պահպանման ու բարեզարդման։

Թեմի մշակութային գործունէութիւնը գլխաւորաբար կը կատարուի համայնքի մէջ գործող միութիւններով եւ կազմակերպութիւններով։

Ազգային Առաջնորդարանի գլխաւոր կառոյցներէն է Սուրբ Ամենափրկիչ Վանքը, որ ոչ միայն Թեմի հոգեւոր եւ համայնքային կեանքի միջնաբերդը կը հանդիսանայ, այլ նաեւ իր պատմական եկեղեցիով, թանգարանով եւ գրադարան-մատենադարանով կը համարուի համահայկական նշանակութեամբ պատմամշակութային հարուստ կեդրոն ինչպէս նաեւ իրանցի եւ արտասահմանեան զբօսաշրջիկներու հետաքրքրութեան առարկայ։ Թեմին մէջ կ՚աշխատին նաեւ այլ կառոյցներ, ինչպէս՝ Կանանց Միութիւններ, Հայրենակցական Միութիւններ, Մշակութային ու Սկաուտ-մարզական Միութիւններ, ինչպէս նաեւ Հ.Յ.Դաշնակցութիւնը իր Հայ Դատի կառոյցով։

«Հորիզոն».- Ի տարբերութիւն Միջին Արեւելեան հայահոծ գաղութներուն, արեւմտեան կիսագունդի մեր հայկական գաղութները այսօր կը դիմագրաւեն հայեցի դաստիարակութեան մարտահրաւէրը։ Նկատի ունենալով, որ Սփիւռքի գոյատեւելիութեան համար խիստ կարեւոր այդ բաղադրիչը մաս կը կազմէ Գանատայի Ազգային Առաջնորդարանի գործունէութեան, ի՞նչ ձեւով նպատակաուղղուած պիտի ըլլայ հայեցի դաստիարակութեան ձեր առաքելութիւնը։

Բաբգէն Արք. Չարեան.- Հայեցի դաստիարակութիւնը, յատկապէս սփիւռքեան մեր Թեմերուն մէջ կարեւոր առաքելութիւն մը կը համարուի եւ պէտք իբրեւ այդպիսին անհրաժեշտ է որ բոլորիս ուշադրութեան առարկան դառնայ։ Բնականօրէն, դպրոցներու մէջ կրթական մարմիններու հսկողութեամբ, տնօրէնութեանց եւ ուսուցչական կազմերու կողմէ կը կատարուի այդ աշխատանքը։ Սակայն, բաւարար չէ միայն դպրոցներու մէջ ջամբուած հայեցի դաստիարակութիւնը, որովհետեւ, հայեցի դաստիարակութիւն ըսելով չենք հասկնար միայն լեզու, պատմութիւն, գրականութիւն։ Հայեցի դաստիարակութիւնը պէտք է սկսի օրօրոցէն, հայ ընտանիքէն ու շարունակուի հայ դպրոցին մէջ եւ հայ դպրոցի կողքին մեր եկեղեցիներուն ու միութիւններու մէջ։

Հայեցի դաստիարակութիւնը մենք կը նկատենք իւրաքանչիւրիս պարտաւորութիւնը, համագանատական եւ միասնական համադրումով։ Բնականօրէն Առաջնորդարանը իր Հայեցի Դաստիարակութեան Խորհուրդի միջոցով կազմակերպելու է լսարաններ, միջոցառումներ յատկապէս այն պատանիներուն ու երիտասարդներուն, որոնք օտար դպրոցներ կը յաճախեն եւ հեռու են մեր կեդրոններէն, միութիւններէն եւ եկեղեցիներէն։ Դաստիարակութեան համար ոչ մէկ ճիգ պէտք է խնայել, որովհետեւ դաստիարակութիւնն է եւ այս պարագային հայեցի դաստիարակութիւնը, որ կ՚երաշխաւորէ վաղուան առողջ սերունդները, վաղուան իսկական տէրերը եւ պաշտպանները մեր սրբութիւններուն, արժէքներուն եւ արդար իրաւունքներուն։ Այստեղ կ՚ուզեմ յայտնել, որ տակաւին համայնքին հետ ծանօթացման եւ ճանաչման ընթացքի մէջ եմ, յառաջիկայ ամիսներուն առիթը կ՚ունենանք խորհուրդի հետ միասին ծրագրելու, կազմակերպելու եւ իրագործելու։

«Հորիզոն».- Հայաստանեայց Առաքելական եկեղեցւոյ առաքելութիւնն է քրիստոնէական կրօնքի դաստիարակութիւնը։ Ի՞նչ ձեւաչափով կը նպատակադրէք 21-֊րդ դարու համաշխարհայնացած «գիտարուեստի  սերունդ»ը ներգրաւել մեր եկեղեցւոյ հոգեւոր կեանքին մէջ։

Բաբգէն Արք. Չարեան.- Այնպէս ինչպէս հայեցի դաստիարակութիւնը, նոյնպէս քրիստոնէական դաստիարակութիւնը կարեւոր աշխատանքներէն մէկը պիտի ըլլայ մեր առաքելութեան մէջ։ Այնպէս ինչպէս հայակերտման աշխատանքը կարեւոր է, նոյնքան եւ աւելի կարեւոր է մարդակերտման առաքելութիւնը։ Այս աշխատանքները զիրար կ՚ամբողջացնեն, լաւ մարդը եւ լաւ հայը ունենալու համար։ Թեմիս քրիստոնէական Դաստիարակութեան Խորհուրդը, կը հսկէ Կիրակնօրեայ դպրոցներու աշխատանքներուն, կը կազմակերպէ ուսուցիչներու վերաւորակաւորման աշխատանոցներ, երիտասարդական համախմբումներ, եւ դպրաց դասերու համագումարներ։ Մեր ժամանումէն ետք, Օնթարիոյ մեր այցելութեան ընթացքին, Գէմպրիճի մէջ, միօրեայ հոգեւորականաց Խորհրդաժողով ունեցանք եւ անդրադարձանք քրիստոնէական դաստիարակութեան աշխատանքներուն, կարիքներուն եւ ծրագիրներուն։ Բնականօրէն նոր առաջարկներ եւ ծրագիրներ գոյութիւն ունին յառաջիկայ տարուայ աշխատանքներուն մէջ ներառելու։ Մեր բոլոր Հոգեւոր Հովիւները եւ Հոգաբարձութիւնները պէտք է զօրավիգ ըլլան եւ քաջալերեն մեր նոր սերունդին եւ ընդհանրապէս մեր եկեղեցւոյ զաւակներուն համար ստեղծելու հետաքրքրական, գրաւիչ բայց միաժամանակ դաստիարակիչ լսարաններ եւ միջոցառումներ, որոնք հոգեւորապէս պիտի սնուցանեն եւ կապուածութիւն մը ստեղծեն մեր եկեղեցիներու եւ հայ կեդրոններու շուրջ ներգրաւուած պահելու զիրենք 21-րդ դարու համաշխարհայնացման պատճառած այլասերումի ալիքին դէմ։

«Հորիզոն».- Արդէն իսկ գրեթէ աւարտած էք մեր թեմի եկեղեցական համայնքներու ձեր այցելութիւնները։ Ի՞նչպէս կ՛արժեւորէք մեր համայնքները։

Բաբգէն Արք. Չարեան.- Առիթը ունեցայ Քէպէգի եւ Օնաթրիոյի մեր համայնքները այցելելու։ Այցելութիւններու ընթացքին, տեսայ իւրաքանչիւր համայնքի դրուածքը, մօտեցումը եւ աշխատելու հնարաւորութիւնները։ Իսկապէս հիացայ, երբ տեսայ կազմակերպուած համախումբ եւ եկեղեցանուէր ու ազգօգուտ նուիրական աշխատանքը։ Բնականօրէն, դժուարութիւններ գոյութիւն ունին, բայց այդ բոլորը ոչ թէ պէտք է յուսահատեցնեն, այլ առիթ պիտի ըլլան մեր  կամքերը պրկելու, մեր ձեռքերը իրար ձեռքերու մէջ դնելու, առաւել յանձնառութեամբ աշխատելու ի խնդիր մեր համայքներու հոգեւոր եւ ազգային կեանքի բարօրութեան եւ մեր Թեմի առաւել զարգացման եւ հզօրացման։

Այս առիթով շնորհակալութիւն կ՚ուզեմ յայտնել իմ նախորդներուն, եկեղեցական եւ աշխարհական ղեկավարներուն եւ բոլոր այն ազգայիններուն, որոնց միջոցով  աշխատանքներ կատարուած են եւ կը շարունակուի կատարուիլ։ Հաւաքական եւ միասնական աշխատանքն է որ հրաշքներ կը գործէ ։

Հարցազրոյցը վարեց՝ Վահագն Գարագաշեան

Youth Seminar 2016

9. August, 2016NewsNo comments

«Վանքը ձեր տո՜ւնն է»

Սուրբ Աստուածածին Վանքի շրջակայքը արդէն իսկ իր հրապուրիչ տեսարանով գրաւած էր մեզ։ Վանքի շուրջ կայացած Եղեռնայիշատակ շինարարութիւնները նոր կերպար մը տուած էին անոր։ Մեծի Տանն Կիլիկիոյ Կաթողիկոսութեան Դպրեվանքը ահա կը գտնուէր մեր դիմաց, այն վայրը ուր ծառայութեան պատրաստած է մեր միաբան հայրերը եւ սնուցած հայ ազգի զաւակներուն հոգիները։

Եօթը երկիրներէ Լիբանան ժամանած 12 երիտասարդներով հասած էինք Պիքֆայա, Ն.Ս.Օ.Տ.Տ. Արամ Ա. Մեծի Տանն Կիլիկիոյ Հայրապետին օրհնութիւնը ստանալու, որմէ ետք պիտի սկսէր մեր միջ-թեմական երիտասարդական եռօրեայ համագումարը, Մեծի Տանն Կիլիկիոյ Կաթողիկոսութեան Լսատեսողական եւ Երիտասարդական բաժանմունքներուն կազմակերպութեամբ՝ 14-16 Յուլիս 2016-ին։ Գանատայի Հայոց Թեմը կը ներկայացնէին՝ Տարօն Հալլաճեանն ու Նորա Զոպեանը։

– «Վանքը ձեր տո՜ւնն է»

Արդէն իսկ առաջին հանդիպումէն, Վեհափառ Հայրապետի այս բառերը հնչեցին երիտասարդներուն ականջներուն։ Եւ իսկապէս, երեք օրերու ընթացքին, Անթիլիասի Մայրավանքը եղաւ մեզի հարազատ ու մտերմիկ տուն։ Վեհափառ Հայրապետը անդրադարձաւ գաղութներէն ներս երիտասարդին դերակատարութեան ու մասնակցութեան կարեւորութեան դերին մասին՝ թէ ազգային եւ թէ եկեղեցական բնագաւարներէն եւ կեանքէն ներս։

Մայրավանքին մէջ առաջին նիստը սկիզբ առաւ Կաթողիկոսարանի Երիտասարդական Բաժանմունքի գործունէութեան ներկայացումով, Բաժանմունքի անդամ՝ պրն. Ռազմիկ Միքայէլեանի կողմէ, որուն յաջորդեցին թեմերու զեկոյցներն ու քննարկումները։ Երկու օրերու ընթացքին, զեկուցեցին՝ Հիւսիսային Ամերիկայի Արեւելեան եւ Արեւմտեան, Գանատայի, Արաբական Միացեալ Էմիրութեանց ու Քաթարի, Քուէյթի, Պարսկաստանի, Կիպրոսի եւ Լիբանանի թեմերու ներկայացուցիչները։ Արծարծուեցաւ «Երիտասարդին իրավիճակը Սփիւռքի տարածքին» նիւթը, անդրադառնալով անոր ազգային եւ եկեղեցական գործունէութեան, ինչպէս նաեւ «Հայ քրիստոնեայ երիտասարդին մարտահրաւէրները», նիւթը, անդրադառնալով երիտասարդին հոգեւոր սնունդը յագեցնելու զանազան խոչընդոտներուն։

Օրուան ընթացքին, Դպրեվանքի Տեսուչ՝ Գերպ. Տ. Թորգոմ Ծ. Վրդ. Տօնոյեան համագումարին մասնակցող երիտասարդներուն ներկայացուց «Հայ Առաքելական Եկեղեցւոյ ծագումը» նիւթը, Թաթէոս եւ Բարթողիմէոս առաքեալներու Հայաստան ժամանումէն, հասնելով մինչեւ Մեծի Տանն Կիլիկիոյ Կաթողիկոսութեան հաստատումը Լիբանանի մէջ ու անոր ներկայ գործունէութիւնը Սփիւռքի տարածքին։ Անոր յաջորդեց «Կիլիկիա» Թանգարանի այցելութիւնը. մօտէն ծանօթացանք եւ տեսանք Սիսի Կաթողիկոսարանէն փրկուած  անգին գանձերը, որոնք բերուած էին 1915-ին ցեղասպանութենէն վերապրած մեր պապերուն ձեռամբ։

Երեկոն շարունակուեցաւ Հայ Երիտասարդական Համալսարանական Ուսանողական Միութեան (ՀԵՀՈՄ-ի) հետ մտերմիկ հաւաքով մը։ Ծանօթացանք միութեան գործունէութեան եւ անդամներուն, որոնք կը գործեն Կաթողիկոսարանի հովանիին ներքեւ։

Երկրորդ օրը, ներկայացուեցաւ «Հայ ժողովրդի արդար պայքարի պաշտպան՝ Կիլիկիոյ Կաթողիկոսարանի հետապնդած դատը Թուրքիոյ Սահմանադրական Դատարանին մօտ»։ Փրոֆ. Նորա Պայրագտարեան, Դատի յանձնախումբի անդամ, ներկայացուց Սիսի Կաթողիկոսարանի վերադարձը պահանջող դատին իրաւաբանական աշխատանքները, իսկ Կաթողիկոսարանի Միջ-եկեղեցական ու Լրատուական բաժանմունքներու Վարիչ՝ Գերպ. Տ. Յուսիկ Ծ. Վրդ. Մարտիրոսեան եւ Լսատեսողական Բաժանմունքի Վարիչ՝ Հոգշ. Տ. Պետրոս Վրդ. Մանուէլեան, ներկայացուցին իրենց փորձառութիւնը պապենական Սիս այցելութեան ընթացքին։

Նոյն օրը, շարունակուեցան Թեմերու զեկոյցները, որմէ ետք ծանօթացանք Կաթողիկոսարանի կայքէջին եւ ընկերային ցանցերուն մէջ անոր տարած աշխատանքին ու դերակատարութեան: Զեկոյցը ներկայացուցին՝ Տեարք Նժդեհ Մկրտիչեան եւ Սեւակ Սաղպազարեան։
Յետմիջօրէին, այցելեցինք «Թռչնոց Բոյն» ինչպէս նաեւ Հայոց Ցեղասպանութեան Որբերուն նուիրած «Արամ Պէզիքեան» Թանգարանը, ուր Թանգարանի պատասխանատու՝ Հոգշ. Տ. Պսակ Աբղ.  Թէփիրճեան մեզի փոխանցեց թանգարանի պատմականը, ներկաներուն փոխադրելով վերապրող հայ ժողովուրդի զաւակներուն առօրեայէն դրուագներ պատմելով՝ որբերուն երկար տարիներ տուն դարձած հաստատութեան մասին։ Կարդացինք  վերապրող որբերուն անունները … Ինչե՜ր չէին տեսած այդ մանուկներուն աչքերը։ Անդրանիկ Ծառուկեանի «Մանկութիւն Չունեցող Մարդիկ»-ը ահա կ՚ապրէինք, «Թռչնոց Բոյնի»-ն պատերէն ներս երբ մանուկներուն պատմութինները կը պատմուէին մեզի, հասնելով մինչեւ «Մամային Պարտէզը», որ Մարիա Ճէյքըպսընի օրերէն, նոյն ձեւով կը պահպանուէր բծախնդրութեամբ ու հոգատարութեամբ։ Այդ պարտէզը, որուն մէջ մեր մեծ հայրերուն ու մեծ մայրերուն դառն ու անոյշ յիշատակները կ՚ընդգրկէր, ահա այսօր կ՚ողջունէր ժառանգորդ սերունդի թոռները։
Շրջանի պատմական վայրերը այցելելէ ետք, «Թռչնոց Բոյն»ի շրջափակին մէջ տեղի ունեցաւ երեկոյեան ընթրիք եւ ընկերային հաւաք։

Համագումարի վերջին օրը յատկացուած էր «Ընկերային Ցանցերը Եւ Հայ Երիտասարդութիւնը» թեմային։ Կաթողիկոսութեան թեմերէն ժամանած ներկայացուցիչներու կողքին, ներկայ էին նաեւ լիբանանահայ երիտասարդական միութիւններու ներկայացուցիչները։ Վեհափառ Հայրապետը անդրադարձաւ այժմէական այս նիւթի կարեւորութեան մասին, ըսելով թէ. «Համացանցի հարցը կը նկատեմ մեր ժողովուրդին ամէնէն հրատապ հարցերէն մէկը, որովհետեւ այս մշակոյթը ուղղակիօրէն կ՚առնչուի հայ ժողովուրդի ինքնութեան, մարդակերտումի եւ հայակերտումի մեր աշխատանքներուն հետ եւ բոլոր մարզերէն ներս կը տեսնենք այս մշակոյթին անդրադարձը: Հայ եկեղեցին ոչ միայն հոգեւոր կեանքի կռուան է, այլեւ հայկական ինքնութեան պահպանման կարեւորագոյն դերակատարներէն մէկն է, հետեւաբար, մեր Կաթողիկոսութիւնը հսկայ աշխատանք տարած է ու պիտի շարունակէ տանիլ ներկայ արհեստագիտութեան հարթակներուն վրայ՝ քայլ պահելով այսօրուան պահանջներուն հետ»:

Օրուան ընթացքին, տեղի ունեցան զանազան զեկոյցներ մասնագէտներու կողմէ եւ աշխատանոցներ ինչպէս՝ Տիկ. Շաղիկ Խուտավերտեանի եւ Տիկ. Թամար Հաշէօլեանի կողմէ ներկայացուած «Ընկերային ցանցերը եւ դաստիարակութիւնը», Դոկտ. Անդրանիկ Տագէսեանի «Ընկերային ցանցերը եւ ինքնութիւնը», Տիկ. Քրիստին Արզումանեան-Ղազարեանի՝ «Branding – Գրաւիչ Ներկայութիւն», Օրդ. Արազ Գոճայեանի՝ «Content Creation – Բովանդակութեան Պատրաստութիւն», պրն. Արամ Սոմունճեանի՝ «The Usage of Photography – Լուսանկարներու Գործածութիւնը», եւ  Տեարք Հրակ Աւետանեան ու Շիրազ Ճէրէճեանի «Ընկերային ցանցերը Եւ Հայ Դատ» նիւթերը: Երիտասարդներով, առիթ ունեցանք արծարծելու ընկերային ցանցերու ամէնուրէք ներկայութեանը մասին, որոնց թէ դրական եւ երբեմն ժխտական ազդեցութիւնները զգալի են մեր բոլորին առօրեայէն ներս եւ մանաւանդ երիտասարդներուն մօտ։ Քննարկումներով եւ հարց-պատասխաններով, կարելի եղաւ անդրադառնալ ընկերային ցանցերու գործածելու ձեւին, անոր իմաստին ու հետեւանքներուն մասին։

Շաբաթ երեկոյեան, համագումարը պաշտօնապէս հասաւ իր աւարտին։ Համագումար մը, որ իր ամբողջութեամբը մեզի առիթ տուաւ զարգացնելու մեր գիտելիքները, խորհելու եւ միասնաբար քննարկելու երիտասարդութեան հետ առնչութիւն ունեցող հարցերուն, եւ ընկերային ջերմ ապրումներով վերադառնալու մեր թեմերը։ Անմոռանալի նախաձեռնութիւն մը, որ իր իւրայատկութիւնը ունեցաւ յատկապէս մեր յարգելի Հուեւոր Հայրերու ներդրումով եւ առաջնորդութեամբ։ Կիրակի առաւօտեան Մայրավանքի զանգակատան ղօղանջը իր խորհրդաւոր կանչով կը հնչէր մեր սրտերուն մէջ …մինչեւ յաջորդ հանդիպում։

Մասնակից՝
Նորա Զոպեան
Գանատայի Հայոց Թեմէն

Communique – World Refugee Day

2. August, 2016NewsNo comments


ԿՈՉ

Միացեալ Ազգերու Կազմակերպութիւնը 2000 թուականին որդեգրած է բանաձեւ մը, նշելու «Գաղթականներու Համաշխարհային Օր»ը ամէն տարի Յունիս 20-ին։ Այս տարի եւս, վերոյիշեալ թուականին նշուեցաւ «Գաղթականներու Համաշխարհային Օր»ը։

Սա առիթ մըն է, անդրադառնալու գաղթականներու դիմագրաւած դժուարութիւններուն եւ յատկապէս մտածելու անոնց օգնելու հնարաւորութիւններուն եւ կարելիութիւններուն մասին։ Սակայն, միաժամանակ նշելու եւ գնահատելու իրենց ունեցած տոկունութիւնը եւ քաջութիւնը, որոնց շնորհիւ անոնք կարողացան յաղթայարել ամէն տեսակի խոչընդոտ եւ դժուարութիւն։

Անցնող 3 տարիներու ընթացքին, ականջալուր եւ եւ ականատեսը եղանք, Սուրիոյ տարածքին տեղի ունեցող երկարատեւ եւ աւերնջ պատերազմական վիճակին։ Աւելի քան 10 միլիոն սուրիացիներ տեղահան եղան իրենց բնակավայրերէն, որ կը կազմէ բնակչութեան առնուազն 45%-ը։ Տեղահան եղան նաեւ սուրիահայեր, որոնք հաստատուեցան Գանատա։

Մեր ժողովուրդը անցնող տարիներուն ձեռք երկարեց սուրիոյ մէջ ապրող թէ գաղթականի ցուպը ձեռին թափառական դարձած սուրիահայ իր եղբայրներուն ու քոյրերուն։ Բնականաբար, դժուարութիւնները չվերացան անմիջապէս. տակաւին գոյութիւն ունին խնդիրներ։

Այս առիթով, շնորհակալութիւն կը յայտնենք եւ կը գնահատենք, Գանատայի Պետութիւնը, որ իր դռները բացաւ եւ հիւրընկալեց ու դիւրութիւններ ստեղծեց գաղթականներուն։ Բոլոր այն միութիւններուն, կազմակերպութիւններուն, հայ թէ օտար բարեսիրական մարմիններուն եւ եկեղեցիներուն եւ անհատներուն, որոնք զօրավիգ կանգնեցան եւ իրենց նիւթաբարոյական օժանդակութիւնը կատարեցին։

Այսու գրով, կոչ կ՚ուղղենք մեր ժողովուրդի զաւակներուն, «Գաղթականներու Համաշխարհային Օր»ուան առիթով, վերանորոգելու համար իրենց յանձնառութիւնը, զօրակցելու գաղթական դարձած սուրիահայ մեր եղբայրներուն ու քոյրերուն։

Աստծույ օրհնութիւնը հը հայցեմ ձեր բոլորին համար, եղէք առողջ, տոկուն եւ քաջ։ Կ՚աղօթեմ որ Աստուած դադրեցնէ պատերազմները այս աշխարհի վրայէն, Սուրիոյ պարգեւէ խաղաղութիւն եւ մանաւանդ մարդկանց մէջ հաշտութիւն։

Սիրոյ ջերմ ողջունիւ՝
Տ. Բաբգէն Սրբ. Արք. Չարեան
Առաջնորդ Գանատայի Հայոց Թեմի

Archives